Lamentations 1

A umana mangana niligur kai ra tarai Sion ba dia ki na vilavilau

1Ua, ra pia na pal nina i ga kor ma ra tarai i ki na lingling ika!
Ua, i da ra ua na vavina, nina i ga ngala pire ra lavur vuna tarai!
Ua, nina i ga tadar na vavina ta ra umana papapar i tar ki na vilavilau!
2I tangtangi tuna ra marum, ma ra lur na matana i varababakai ta ra pagupagu na ngiene;
Ta diat par dia lalaure pa ta na i vamaram ia;
A umana talaina par dia tar vagu pa ia, dia tar ki na vargegelenai me.
3Iuda i tar mareng, tago i ki na malari, ma tago ra papalum i tup ia;
I ki livuan ta ra umana Tematana, ma pa i tikan tadav ra ningo;
Diat par dia korot mur ia dia tar korot tadav ia ba i ki na malari.
4A umana nga Sion dia ki na niligur, tago pa ta na mulai i vana ta ra ngala na lukara;
Kana lavur mataniolo dia kapakapana ka, kana umana tena tinabar dia riri;
Kana umana inip na vavina a umana biaui, ma ia iat i ki ma ra niligur.
5Diat dia ki na vargegelenai me dia tar ki na lua, kana umana ebar dia tamtavua;
Tago ra Luluai i tar vakadik ia ure kana peal varpiam;
Kana umana bul ikilik dia tar vana ta ra kini na vilavilau ta ra luaina mata i ra ebar.
6Ma ra minamar par i tar panie kan natu i Sion;
Kana umana luluai dia varogop ma ra umana me ba pa dia tikan tadav ta pia na vura,
Ma dia tar lop kan nina i korot mur diat, tago pa ta ongor i diat.
7Ta ra e i ki na kinadik tana, ma ta ra e i malari tana,
Ierusalem i nuk pa kana lavur vakak na tabarikik, nina i ga vatur vake papa ania iat;
Ba kana tarai dia virua ta ra lima i ra ebar, pa ta na i maravut ia;
Diat dia ki na vargegelenai me dia ga gire, ma dia ga varkulumai ure kana binilua.
8Ierusalem i tar varpiam tuna, kari i da ra magit i kerek;
Diat par dia ga ru ia go dia pidimuane, tago dia tar gire ra pakana tuna;
Maia, i oir, ma i tur tapuku.
9Kana mal i keo; pa i ga nuk pa ra mutuaina;
Kari i tar bura vakaian; pa ta na i vamaram ia;
Luluai, una bobe ra magit i tup iau; tago ra ebar i tar vangala pa mule.
10Nina dir ki na vargegelenai me i tar tulue ra limana upi kana lavur vakak na magit;
Tago i tar gire ba ra umana Tematana dia tar ruk ta kana pal i gomgom,
Nina u ga vartuluai tana ba koko diat a ruk ta kaum kivung.
11Kana tarai par dia oir, dia nuk upi ra nian;
Dia tar kia kadia lavur vakak na magit upi ra magit na nian, upi ra bala i diat na lagar tana;
Luluai, una gire, ma una bobe, tago iau tar ki kaina.
12Avat par ba ava vana pakit, pa ava mari iau vang?
Ea, avat a gire upi ta niligur ba dir varogop ma kaugu niligur, nina di pait ia tagu,
Nina ra Luluai i tar vatakunuan ra balagu me ta ra bung i ngangal na kulot tana.
13Marama liu i tar tulue ra iap ta ra umana urugu, ma i tar ongor pa diat;
I tar vatur ra ubene ure ra kaugu, i tar tulue vatalil iau;
I tar li iau, ma iau bilua ra bungbung parika.
14Ra limana i tar vi tar ra kip i vuna ta kaugu lavur varpiam;
Di tar vi guve diat, dia tar ki taun ra inoagu; i tar vapanie ra dekdekigu;
A Luluai i tar tul tar iau ta ra lima i diat ba pa i tale iau pi ina tur bat diat.
15A Luluai i tar pidimuane kaugu lavur lebe piragu;
I tar vatut ra ngala na kor ure iau upi na ubu vue kaugu umana barmana;
A Luluai i tar rua ra inip na vavina Iuda da ta ra tung na vain.
16Ure go ra lavur magit iau tangtangi, ma ra matagu i lur;
Tago ra tena varmaram ba na valagar ra balagu i tar ki vailik kan iau;
A umana natugu dia tar lingling ika, tago ra ebar i tar ongor.

17Sion i tultulue ra limana; pa ta na akari ba na vamaram ia;
A Luluai i tar vartuluai ure Iakob ba diat dia ki kikil ia diat a vargegelenai me;
Ierusalem i da ra magit i kerek pire diat.
18A Luluai i tar takodo; tago iau tar piam vue kana vartuluai;
Ea, avat ra lavur vuna tarai par, avat a valongore, ma avat a gire kaugu niligur;
Kaugu lavur inip na vavina ma kaugu lavur barmana dia tar vana ta ra kini na vilavilau.
19Iau ga oro upi ra umana talaigu, ma dia ga tuam pa iau;
Kaugu umana tena tinabar ma kaugu umana patuana dia tar mat ta ra pia na pal,
Ba dia ga tikan upi ra magit na nian upi diat a valagar ra bala i diat me.
20Ea Luluai, una gire; iau tar ki na malari; ra balagu i purpuruan;
I tapuku ra balagu, tago iau tar varpiam tuna;
Aro irai a pakat na vinarubu i varvaligur, ma ati ra pia na pal a minat.
21Di tar valongore kaugu niriri; pa ta na ati ba na vamaram iau;
Kaugu lavur ebar par dia tar valongore ra varvai ure kaugu kini na purpuruan; dia gugu, tago u tar pait ia;
Ta kaum vartuluai na ga vut boko ra bung u ga vatang ia, ma diat a vardada ma iau.
Boina ba kadia lavur varpiam diat a tur rikai ta ra luaina matam;
Ma una babali pire diat, da u ga bali kaugu lavur varpiam piragu;
Tago mangoro kaugu niriri, ma ra balagu i tar bilua.
22